एपीएफ नेपाल र भारतको एसएसबीबीच दशौं सीमा सुरक्षा बैठक सुरु

सशस्त्र प्रहरी बल (एपीएफ) नेपाल र भारतको सशस्त्र सीमा बल (एसएसबी) बीचको दशौं द्विपक्षीय समन्वय बैठक बुधबार काठमाडौंको हलचोकस्थित एपीएफ मुख्यालयमा सुरु भएको छ। दुई दिन चल्ने बैठकमा एपीएफका महानिरीक्षक र एसएसबीका महानिर्देशक सहभागी छन्। बैठकले सीमा सुरक्षा तथा व्यवस्थापनलाई बलियो बनाउने र सीमापार अपराध नियन्त्रण गर्ने विषयमा छलफल गर्नेछ। एपीएफ नेपालका प्रवक्ता नेत्र बहादुर कार्कीका अनुसार बैठकमा दुई देशका सीमा सुरक्षा निकायबीच भइरहेका संयुक्त प्रयासहरूको समीक्षा गरिनेछ।