प्रचण्डद्वारा बिरामी माधव नेपालसँग भेट, प्रदेश सरकार गठनबारे छलफल

नेपाली कम्युनिस्ट पार्टीका संयोजक पुष्पकमल दाहाल 'प्रचण्ड'ले सोमबार सह-संयोजक माधवकुमार नेपाललाई उनको निवास कोटेश्वरमा पुगेर भेटेका छन्। केही दिनदेखि बिरामी भई एन्टिबायोटिक सेवन गरिरहेका नेपालको स्वास्थ्य अवस्था बुझ्न र शीघ्र स्वास्थ्यलाभको कामना गर्न प्रचण्ड त्यहाँ पुगेका हुन्। श्रीलङ्का भ्रमणबाट फर्किएका प्रचण्डले सो अवसरमा नेपालसँग प्रदेश सरकारहरूको गठन र नयाँ सत्ता समीकरणका विषयमा समेत छलफल गरेका छन्। प्रदेश सरकारबारे साझा धारणा बनाउन प्रचण्डले नेकपा एमाले र नेपाली कांग्रेसका नेताहरूसँग पनि संवाद अगाडि बढाउने तयारी गरेका छन्।