एन्फाको निलम्बन फुकुवा गरी फुटबल गतिविधि सुचारु गर्न २१ क्लबको माग

सहिद स्मारक लिगका २१ फुटबल क्लबहरूले अखिल नेपाल फुटबल संघ (एन्फा) माथिको बाह्य हस्तक्षेप बन्द गरी निलम्बन फिर्ता लिन माग गरेका छन्। शुक्रबार संयुक्त विज्ञप्ति जारी गर्दै क्लबहरूले एक महिनादेखि फुटबल गतिविधि ठप्प हुँदा हजारौँ खेलाडी, प्रशिक्षक र निर्णायकहरू प्रभावित भएको बताएका छन्। उनीहरूले राष्ट्रिय लिग र महिला लिगसहित रोकिएका प्रतियोगिताहरू तत्काल सुरु गर्न तीनबुँदे माग अघि सारेका छन्। एन्फामा देखिएको अन्योलले आगामी अन्तर्राष्ट्रिय प्रतियोगिताहरूमा नेपालको सहभागिता समेत संकटमा परेको छ।