साउनको दोस्रो सोमबार पशुपतिनाथ र डोलेश्वर महादेवमा भक्तजनको घुइँचो

साउन महिनाको दोस्रो सोमबार काठमाडौँको पशुपतिनाथ र भक्तपुरको सिपाडोलस्थित डोलेश्वर महादेव मन्दिरमा बिहानैदेखि भक्तजनको ठूलो भीड लागेको छ। हिन्दू धर्मावलम्बीहरूले भगवान् शिवको प्रिय महिना मानिने साउनको सोमबार व्रत बसी जल, दूध र बेलपत्र चढाएर पूजा आराधना गरेका छन्। डोलेश्वर र पशुपतिनाथका साथै देशभरका विभिन्न शिवालयहरूमा पनि श्रद्धालुहरूको उल्लेख्य उपस्थिति रहेको छ। साउनको सोमबार शिवजीको विशेष पूजा गर्नाले मनोकाङ्क्षा पूरा हुने धार्मिक विश्वास रहिआएको छ।