पत्रकार किशोर श्रेष्ठलाई थप चार दिन हिरासतमा राख्न अदालतको अनुमति

प्रहरीले जनआस्था साप्ताहिकका सम्पादक किशोर श्रेष्ठलाई बुधबार राति कुसुन्तीस्थित निवासबाट पक्राउ गरेको छ। पक्राउ लगत्तै प्रहरी टोलीले उनको नख्खुस्थित निवास र काठमाडौंमा रहेको जनआस्थाको कार्यालयमा छापा मारी ल्यापटप र मोबाइल लगायतका विद्युतीय उपकरणहरू जफत गरेको छ। काठमाडौं जिल्ला प्रहरी परिसरले यस घटनाबारे अनुसन्धान गरिरहेको छ भने पत्रकारहरूले यस कदमको विरोध गरेका छन्।

काठमाडौं जिल्ला अदालतले गोपनीयताको हक उल्लंघन गरेको आरोपमा अनुसन्धानका लागि जनआस्था साप्ताहिकका प्रधानसम्पादक किशोर श्रेष्ठलाई थप चार दिन हिरासतमा राख्न अनुमति दिएको छ। चरित्र हत्या र गोपनीयता भंग गरेको भन्दै प्रहरीले श्रेष्ठलाई बुधबार राति ललितपुरस्थित उनको निवासबाट पक्राउ गरेको थियो। यसैबीच, श्रेष्ठकी पत्नी सरस्वती श्रेष्ठले दायर गरेको बन्दी प्रत्यक्षीकरण रिटमा सर्वोच्च अदालतमा सुनुवाइ सकिएको छ। प्रेस काउन्सिल नेपाल र वर्ल्ड एसोसिएसन अफ प्रेस काउन्सिल लगायतका संस्थाहरूले पत्रकार श्रेष्ठको पक्राउ र सञ्चार गृहमा गरिएको छापाप्रति गम्भीर चासो व्यक्त गरेका छन्।