मकवानपुरको ज्यामिरेमा जमिन चिराचिरा, १६ घरपरिवार सुरक्षित स्थानमा सारिए

मकवानपुरको बकैया गाउँपालिका–६ तल्लो ज्यामिरेस्थित गरगरे बस्तीमा जमिन चिराचिरा परी भासिएपछि करिब १६ घरपरिवारलाई सुरक्षित स्थानमा सारिएको छ। प्रहरीका अनुसार भिरालो सतहमा रहेको बस्तीमा जमिन चिराचिरा परेपछि एक दर्जनभन्दा बढी घरपरिवारलाई अन्यत्र स्थानान्तरण गरिएको हो। सो क्षेत्रमा पहिरोको जोखिम पनि बढेको बताइएको छ।

निरन्तरको वर्षापछि मकवानपुरको बकैया गाउँपालिका–६, ठूलो ज्यामिरेलगायत क्षेत्रमा जमिन चिरिएर भासिन थालेपछि बस्ती जोखिममा परेको छ। करिब दुई वर्गकिलोमिटर क्षेत्रमा जमिन भासिएको छ भने कतिपय स्थानमा १२ फिटसम्म जमिन धसिएको छ। पहिरोको जोखिम बढेपछि करिब १५/१६ घरपरिवारलाई सुरक्षित स्थानमा सारिएको छ। भिरालो सतहमा रहेको यो बस्ती असोज ११ गतेयता प्रभावित भएको छ।