राष्ट्रपति पौडेलद्वारा संघीय संसद्को अधिवेशन असोज १६ गतेदेखि अन्त्य

मन्त्रिपरिषद्ले राष्ट्रपति रामचन्द्र पौडेलसमक्ष संघीय संसद्को वर्तमान अधिवेशन असोज १६ अर्थात् अक्टोबर २ मा अन्त्य गर्न सिफारिस गरेको छ। मंगलबार बसेको मन्त्रिपरिषद् बैठकले अधिवेशन अन्त्य गर्ने निर्णय गरी राष्ट्रपति कार्यालयमा पत्र पठाएको हो। संविधानअनुसार सरकारको सिफारिसमा राष्ट्रपतिले संसद् अधिवेशन अन्त्य गर्ने व्यवस्था छ। जेठ ११ मा सुरु भएको यो अधिवेशनले सरकारको नीति, बजेट, छवटा अध्यादेश प्रतिस्थापन विधेयक तथा सहिद दशरथ चन्द स्वास्थ्य विज्ञान विश्वविद्यालय विधेयकजस्ता महत्त्वपूर्ण विधेयक पारित गरेको छ भने दशभन्दा बढी विधेयक समितिमा विचाराधीन छन्।

राष्ट्रपति रामचन्द्र पौडेलले संघीय संसद्का दुवै सदनको चालु अधिवेशन असोज १६ गते मध्यरातदेखि अन्त्य गर्नुभएको छ। नेपालको संविधानबमोजिम मन्त्रिपरिषद्को सिफारिसमा राष्ट्रपति पौडेलले अधिवेशन अन्त्य गर्ने निर्णय गर्नुभएको राष्ट्रपति कार्यालयका प्रवक्ता कृष्णबहादुर शाहीले जानकारी दिनुभयो। जेठ ११ गते सुरु भएको उक्त अधिवेशनमा सरकारको नीति, बजेट, छवटा अध्यादेश प्रतिस्थापन विधेयक तथा शहीद दशरथ चन्द स्वास्थ्य विज्ञान विश्वविद्यालय विधेयकलगायत महत्वपूर्ण कानुन पारित भएका छन् भने दशभन्दा बढी विधेयक समितिमा विचाराधीन छन्।