पोखरामा स्कुल बस दुर्घटना हुँदा पाँच जनाको मृत्यु, १४ घायल

कास्कीको पोखरा महानगरपालिका-२८ स्थित ओक्ले भीरमा विद्यार्थी बोकेको विद्यालय बस दुर्घटनामा परेको छ। प्रहरीका अनुसार दुर्घटनास्थलबाट हालसम्म १८ जनाको उद्धार गरिएको छ। उक्त बसमा कालिका बोर्डिङ स्कुलका विद्यार्थीहरू सवार थिए।

पोखरा महानगरपालिका–२८ मा शुक्रबार बिहान कालिका इङ्लिस स्कुलको स्कुल बस करिब २०० मिटर खसेर दुर्घटना हुँदा चार विद्यार्थीसहित पाँच जनाको मृत्यु भएको छ भने १४ जना घायल भएका छन्। कास्की जिल्ला प्रहरी कार्यालयका प्रहरी उपरीक्षक नबिन कार्कीका अनुसार मृत्यु हुनेमा तीन बालिका, एक बालक र एक स्थानीय बासिन्दा छन्, जसको परिचय खुल्न बाँकी छ। घायलहरूको पोखरा स्वास्थ्य विज्ञान प्रतिष्ठानमा उपचार भइरहेको छ। यसअघि जिल्ला प्रहरी कार्यालयका प्रहरी नायब उपरीक्षक बिरेन्द्र कुमार पासवानले मझठानाबाट आउँदै गरेको बसमा भएको दुर्घटनामा १८ विद्यार्थी उद्धार गरी अस्पताल पठाइएको बताएका थिए।