मधेश प्रदेश सरकारबाट एमालेले समर्थन फिर्ता लियो, चार मन्त्रीले राजीनामा दिए

नेकपा एमालेले नेपाली कांग्रेसका कृष्णप्रसाद यादव नेतृत्वको मधेश प्रदेश सरकारलाई दिएको समर्थन फिर्ता लिएको छ। एमालेबाट सरकारमा सहभागी चार मन्त्री शारदादेवी थापा, लखनदास, मोहम्मद समिर र मनोजकुमार सिंहले शुक्रबार राजीनामा दिएका छन्। एमाले प्रमुख सचेतक हरिनारायण महतोले समर्थन फिर्ता लिएको जानकारी दिएसँगै यादव नेतृत्वको सरकार संकटमा परेको छ।

नेकपा एमालेले मधेश प्रदेश सरकारलाई दिएको समर्थन फिर्ता लिएको छ र सरकारमा सहभागी चार मन्त्रीले शुक्रबार राजीनामा दिएका छन्। राजीनामा दिनेमा श्रम तथा यातायातमन्त्री शारदादेवी थापा, भौतिक पूर्वाधार विकासमन्त्री मोहम्मद समीर, शिक्षा तथा संस्कृतिमन्त्री मनोजकुमार सिंह र खेलकुद तथा समाजकल्याणमन्त्री लखनदास छन्। एमाले मधेश प्रदेश संसदीय दलका नेता सरोज यादव र प्रमुख सचेतक हरिनारायण महतोले प्रदेश प्रमुख सुरेन्द्रलाभ कर्णलाई समर्थन फिर्ता लिएको जानकारी गराएका छन्। नेपाली कांग्रेसका कृष्णप्रसाद यादव नेतृत्वको सरकार अल्पमतमा परेको देखिन्छ।