बालअधिकारका सवालमा मन्त्री सीता बादीद्वारा बालबालिकासँग प्रत्यक्ष संवाद

महिला, बालबालिका, लैङ्गिक तथा यौनिक अल्पसङ्ख्यक र सामाजिक सुरक्षा मन्त्री सीता बादीले बालबालिकासँग प्रत्यक्ष संवाद गर्दै उनीहरूका समस्या, अनुभव र सुझाव सुनेकी छन्। मन्त्रालयद्वारा आयोजित दुईदिने राष्ट्रिय परामर्श कार्यक्रमअन्तर्गत सोमबार काठमाडौँमा सम्पन्न ‘मिट माइ मिनिस्टर’ कार्यक्रममा उनले बालबालिकासँग प्रत्यक्ष संवाद गरेकी हुन्। बादीले बालबालिकाको सर्वाङ्गीण विकास, अधिकार संरक्षण र सुरक्षित भविष्य सुनिश्चित गर्न सरकार प्रतिबद्ध रहेको बताइन्। संवादमा बालविवाहदेखि बालश्रमसम्मका सवाल उठेका थिए र नीतिगत सुझाव सङ्कलन गरिएको थियो।