पत्रकार महासंघद्वारा पत्रकारलाई धम्की दिने घटनाको निन्दा

नेपाल पत्रकार महासंघले प्रकाशित समाचारका विषयमा पत्रकारलाई धम्की दिने व्यक्तिहरूविरुद्ध कानुनी कारबाहीको माग गरेको छ। महासंघका महासचिव रामप्रसाद दाहालद्वारा जारी विज्ञप्तिमा यस्तो प्रेसविरोधी कार्यप्रति गम्भीर ध्यानाकर्षण भएको जनाइएको छ। सिरहास्थित अपन दैनिकका सञ्चारकर्मी श्यामकुमार यादवलाई तस्करीसम्बन्धी समाचार प्रकाशित गरेको विषयलाई लिएर कार्यालय र घरमै पुगेर धम्की दिइएको घटनाप्रति महासंघले आपत्ति जनाएको हो। महासंघले उक्त कार्यलाई निन्दनीय र प्रेस स्वतन्त्रताविरोधी भन्दै पत्रकारको सुरक्षा तथा स्वतन्त्रताको संरक्षण गर्न माग गरेको छ।