हानि तथा नोक्सानी कोषको २० मिलियन डलरका लागि नेपालले प्रस्ताव लेखन सुरु गरेको छ

जलवायुजन्य विपद्बाट प्रभावित समुदायलाई लक्षित गर्दै नेपाल सरकारले हानि तथा नोक्सानी कोषबाट प्राप्त हुने २० मिलियन अमेरिकी डलर परिचालनका लागि परियोजना प्रस्ताव लेखन सुरु गरेको छ। कोषले नेपाललाई कुल २१.६ मिलियन अमेरिकी डलर छुट्याउने निर्णय गरेसँगै सरकारले प्रस्ताव लेखन र कार्यान्वयनकारी संस्था छनोटको प्रक्रिया अघि बढाएको हो। कृषि, वन तथा पर्यावरण मन्त्रालय, जलवायु परिवर्तन व्यवस्थापन महाशाखा प्रमुख डा. महेश्वर ढकालका अनुसार सरकारले कार्यान्वयन गर्नसक्ने र छिटो प्रक्रिया अघि बढाउन सक्ने उपयुक्त संस्था छनोटका लागि मूल्याङ्कन पनि गरिरहेको छ।