विपक्षी दलहरूले संघीय संसद्को अधिवेशन तत्काल बोलाउन माग गरे

संघीय संसदमा प्रतिनिधित्व गर्ने विपक्षी दलहरूको बैठक सोमबार काठमाडौंको सिंहदरबारस्थित नेपाली कांग्रेस संसदीय दलको कार्यालयमा बसेको छ। प्रमुख प्रतिपक्षी नेपाली कांग्रेसले आयोजना गरेको उक्त बैठकमा नेकपा (एमाले) र नेपाल कम्युनिस्ट पार्टीलगायत दलका प्रतिनिधिहरू सहभागी भएका थिए। बैठकमा समसामयिक राजनीतिक घटनाक्रमबारे छलफल गरी संसदमा साझा धारणा बनाउने विषयमा कुरा भएको छ। सरकारले अध्यादेशमार्फत शासन गर्न खोजेको आरोप लगाउँदै विपक्षी दलहरूले संघीय संसदको अधिवेशन तत्काल बोलाउन माग गरेका छन्।

विपक्षी दलहरूले सरकारले अध्यादेशमार्फत शासन गर्न र व्यवस्थापिकालाई बाइपास गर्न खोजेको आरोप लगाउँदै संघीय संसद्को अधिवेशन तत्काल बोलाउन माग गरेका छन्। सोमबार सिंहदरबारस्थित नेपाली कांग्रेस संसदीय दलको कार्यालयमा नेपाली कांग्रेसले बोलाएको विपक्षी दलहरूको बैठकमा यो माग गरिएको हो। बैठकमा नेपाली कांग्रेस संसदीय दलका नेता भीष्मराज आङदेम्बे, नेकपा एमाले संसदीय दलका उपनेता पद्म आर्याल र नेपाल कम्युनिस्ट पार्टीका नेता प्रमेश हमाललगायत सहभागी थिए। मंगलबार आङदेम्बेले सिंहदरबारमा सभामुख डोलप्रसाद अर्यालसँग भेट गर्दै संसद् यथाशीघ्र बोलाउनुपर्ने विषयमा कुरा गरेका थिए।