अनलाइन ठगी र आपराधिक गतिविधि बढेपछि मकवानपुर प्रशासनद्वारा सतर्कता अपनाउन आग्रह

अनलाइन ठगी र आपराधिक गतिविधि बढेको भन्दै जिल्ला प्रशासन कार्यालय मकवानपुरले होटल व्यवसायी र सर्वसाधारणलाई शङ्कास्पद व्यक्तिमाथि निगरानी बढाउन आग्रह गरेको छ। सहायक प्रमुख जिल्ला अधिकारी मोहनराज जोशीले बिहीबार एक सूचना जारी गर्दै स्क्यामरहरूले विभिन्न प्रलोभन देखाएर बैंक खातामा रकम जम्मा गराउने कार्य गरिरहेको भन्दै सचेत रहन अनुरोध गर्नुभएको छ। हेटौँडाका होटल तथा गेष्ट हाउसमा बस्ने केही व्यक्तिहरू अनलाइन किनमेल र जागिरको प्रलोभन देखाउने जस्ता ठगी कार्यमा संलग्न रहेको प्रशासनले जनाएको छ।