कक्षा १ देखि १२ सम्म यौन शिक्षा अनिवार्य गर्न सांसद रञ्जु दर्शनाको माग

प्रतिनिधिसभाको सोमबारको बैठकमा सांसदहरूले महिलामाथि हुने हिंसा र बालबालिकामाथि हुने यौनजन्य दुर्व्यवहारप्रति सरकारको ध्यानाकर्षण गराएका छन्। सांसद रञ्जु न्यौपाने (रञ्जु दर्शना) ले कक्षा १ देखि १२ सम्म उमेरअनुकूल र वैज्ञानिक यौन शिक्षा अनिवार्य गर्न माग गर्नुभयो। अर्की सांसद आकृति अवस्थीले विद्यालयमा शिक्षकहरूबाटै छात्राहरू असुरक्षित भइरहेको अवस्थाबारे बोल्दै सुरक्षाको माग गर्नुभयो।

राष्ट्रिय स्वतन्त्र पार्टीकी सांसद रञ्जु दर्शनाले महिला तथा बालबालिकामाथि हुने यौन हिंसा न्यूनीकरण गर्न कक्षा १ देखि १२ सम्म यौन शिक्षा अनिवार्य गर्न सरकारसँग माग गरेकी छन्। प्रतिनिधि सभाको बैठकमा बोल्दै उनले विद्यालयका पाठ्यपुस्तकमा उमेर अनुकूल र वैज्ञानिक यौन शिक्षा समावेश गर्नुपर्नेमा जोड दिइन्। बैठकमा सांसद आकृति अवस्थीले पनि विद्यालयमा छात्राहरूको सुरक्षाको विषयमा ध्यानाकर्षण गराउँदै यौनजन्य दुर्व्यवहार रोक्न माग गरेकी थिइन्।