मुख्य सडक अवरुद्ध, त्रिभुवन राजपथ प्रमुख वैकल्पिक मार्ग

लगातारको भारी वर्षाका कारण पृथ्वी राजमार्ग र कान्ति राजमार्ग अवरुद्ध भएपछि काठमाडौँ आवतजावतका लागि त्रिभुवन राजपथ पुनः प्रमुख वैकल्पिक मार्ग बनेको छ। साँघुरो सडकमा जाम तथा जोखिम कम गर्न जिल्ला प्रशासन कार्यालय मकवानपुरले हेटौँडाबाट काठमाडौँ र काठमाडौँबाट हेटौँडा जाने सवारीका लागि छुट्टाछुट्टै समयतालिका लागू गरेको छ। प्रमुख जिल्ला अधिकारी वसन्त अधिकारीका अनुसार तालिका जाम र जोखिम कम गर्न बनाइएको हो। एलपी ग्यास तथा इन्धन बोकेका सवारीबाहेक १० चक्केभन्दा ठूला र १५ टनभन्दा बढी भार भएका मालवाहक सवारीलाई त्रिभुवन राजपथमा सञ्चालन गर्न रोक लगाइएको छ।