रुसी तेल प्रशोधन केन्द्रमा आक्रमण बढाउने जेलेन्स्कीको चेतावनी

युक्रेनी राष्ट्रपति भोलोदिमिर जेलेन्स्कीले रुसले नागरिक पूर्वाधारमाथि हवाई आक्रमणको नयाँ रणनीति अपनाएको भन्दै जवाफमा रुसी तेल प्रशोधन केन्द्रमा आक्रमण तीव्र बनाउने चेतावनी दिएका छन् । रोयटर्ससँगको अन्तर्वार्तामा उनले रुसी राष्ट्रपति भ्लादिमिर पुटिनले आगामी जाडोयामलाई लक्षित गर्दै नागरिक पूर्वाधारमाथि आक्रमण विस्तार गर्ने नयाँ सैन्य सिद्धान्त जारी गरेको देखाउने दस्तावेज युक्रेनी गुप्तचर निकायले प्राप्त गरेको दाबी गरे । उनका अनुसार उक्त सिद्धान्तअन्तर्गत पूर्वाधार, ढुवानी तथा रसद प्रणालीलाई लक्षित गरिनेछ । नयाँ आक्रमण कहिले र कहाँ हुने भन्नेबारे भने समाचारमा उल्लेख छैन ।