फ्रान्समा हिंसा र लुटपाटपछि क्षतिपूर्ति हिंसामा संलग्नहरूबाटै असुलिने

फ्रान्सभर भएका हिंसात्मक प्रदर्शन, तोडफोड र व्यापक लुटपाटबाट अर्बौँ युरोको भौतिक क्षति भएपछि फ्रान्सेली सरकारले हिंसामा संलग्न व्यक्तिहरूबाटै क्षतिपूर्ति असुल गर्ने कडा नीतिको घोषणा गरेको छ। प्रधानमन्त्री सेबास्टियन लेकोर्नुले दङ्गाबाट प्रभावित व्यवसायी र क्षेत्रको पुनःउत्थानका लागि विशेष कोष बनाइने र त्यसको सम्पूर्ण खर्च हिंसा फैलाउनेहरूबाटै असुल गरिने स्पष्ट पारेको बीबीसीले जनाएको छ। सोमबार आयोजित आपत्कालीन बैठकपछि बोल्दै उनले यस्तो बताएका हुन्। महँगी र खस्कँदो सार्वजनिक सेवाविरुद्ध शनिबार भएको प्रदर्शन हिंसात्मक बनेपछि सरकार र राष्ट्रपति इमानुएल म्याक्रोंमाथि दबाब बढेको छ।