पोखरा स्कुल बस दुर्घटना छानबिन : प्राविधिक खराबी र तीव्र गतिलाई दोष

पोखरा महानगरपालिकाले गठन गरेको छानबिन समितिले पोखरा महानगरपालिका–२८ माझठानास्थित ओख्लेमा कालिका बोर्डिङ स्कुलको बस दुर्घटनाको कारण बसको प्राविधिक खराबी, तीव्र गति र चालकको लापरवाही रहेको निष्कर्ष निकालेको छ। वरिष्ठ शिक्षा अधिकृत बद्रीनाथ सुवेदीको संयोजकत्वमा गठित समितिले नगरप्रमुखसमक्ष प्रतिवेदन बुझाएको हो। गत असोज २३ गते बिहान विद्यार्थी लिएर माझठानाबाट कालिकातर्फ जाँदै गरेको ग २ ख १७४७ नम्बरको बस सडकबाट करिब २०० मिटर तल खसेको थियो। दुर्घटनामा ६ जनाको मृत्यु भएको छ भने केही विद्यार्थी घाइते छन्।