झापामा धान खेतमै सयपत्री फूलखेती, आम्दानी बढ्ने आशा

झापाको बुद्धशान्ति गाउँपालिका–३ दुइरिङ्गेका तीन किसानले धान खेती गर्ने खेतमा व्यावसायिक सयपत्री फूलखेती सुरु गरेका छन्। वर्षभरि धानखेती गर्दा करिब ५० हजार रुपैयाँ मात्र आम्दानी हुने जमिनबाट अब १० देखि १२ लाख रुपैयाँसम्मको कारोबार गर्ने लक्ष्य राखिएको छ। फूलखेतीमा करिब पाँच लाख रुपैयाँ लगानी गरिएको छ।

झापाको बुद्धशान्ति गाउँपालिका–३ दुइरिङ्गेका तीन किसानले धानखेती गर्दै आएको १० कट्ठा जमिनमा व्यावसायिक सयपत्री फूलखेती सुरु गरेका छन्। विनोद रिजाल, गुणराज न्यौपाने र वीरबल बानियाँले सामूहिक रूपमा फूलखेती गरेका हुन्। धानखेतीबाट वर्षभरिमा करिब ५० हजार रुपैयाँ मात्र आम्दानी हुने उक्त जमिनबाट फूलखेती गरेर १० देखि १२ लाख रुपैयाँसम्मको कारोबार गर्ने लक्ष्य राखिएको छ। अहिले खेतमा सयपत्रीका फूल ढकमक्क फुलेका छन्।