केराको अस्वाभाविक मूल्यवृद्धि नियन्त्रण गर्न र बजार अनुगमन बढाउन उत्पादकको माग

कैलाली र कञ्चनपुरका केरा उत्पादकहरूले बजारमा केराको मूल्य अस्वाभाविक रूपमा बढेको भन्दै प्रभावकारी बजार अनुगमन गर्न सरकारसँग माग गरेका छन्। केरा उत्पादक संघ कैलाली र केरा उत्पादक तथा व्यवसायी संघ कञ्चनपुरले बुधबार संयुक्त पत्रकार सम्मेलन गर्दै बिचौलिया र कालोबजारीका कारण उपभोक्ता मूल्य ३०० प्रतिशतसम्म बढेको दाबी गरेका हुन्। बजार नियन्त्रणका लागि संघले बगानबाट बिक्री हुने काँचो केराको सिफारिस मूल्य समेत सार्वजनिक गरेको छ। किसानहरूले वास्तविक उत्पादकले उचित मूल्य नपाएको तर उपभोक्ताले महँगो तिर्नुपरेको गुनासो गरेका छन्।