दुर्गा प्रसाईंसँगको सहकार्य तोड्दै धवलशमशेर राणाद्वारा जय नेपाल पार्टी दर्ता

नयाँ राजनीतिक दल गठन गर्ने घोषणा गरेको दुई महिना नपुग्दै डा. धवलशमशेर राणा र मेडिकल व्यवसायी दुर्गा प्रसाईंबीचको सहकार्य टुटेको छ। पार्टी औपचारिक रूपमा दर्ता हुनुअघि नै दुई नेताबीच कुरा नमिलेपछि विभाजन आएको हो। राप्रपाबाट अलग भएका राणा र प्रसाईंले अब छुट्टाछुट्टै राजनीतिक यात्रा अगाडि बढाउने तयारी गरेका छन्।

राष्ट्रिय प्रजातन्त्र पार्टीका पूर्वमहामन्त्री डा. धवलशमशेर राणाले काठमाडौंस्थित निर्वाचन आयोगमा 'जय नेपाल पार्टी' दर्ता गराएका छन्। मेडिकल व्यवसायी तथा अभियन्ता दुर्गा प्रसाईंसँगको दुई महिना लामो सहकार्य शक्ति बाँडफाँटमा कुरा नमिलेपछि औपचारिक रूपमा टुङ्गिएको हो। राणाले प्रसाईंलाई भविष्यमा सहकार्यका लागि निम्तो दिए पनि प्रसाईंले छुट्टै राजनीतिक शक्ति निर्माण गर्ने तयारी गरेका छन्।