नागढुंगा सुरुङमार्गको शुल्क क्यूआरबाट तिर्न सानिमा बैंक र ट्रक व्यवसायीबीच सम्झौता

सानिमा बैंक लिमिटेड र नेपाल ट्रक यातायात व्यवसायी महासंघबीच नागढुंगा–सिस्नेखोला सुरुङमार्गको शुल्क डिजिटल माध्यमबाट भुक्तानी गर्ने सम्झौता भएको छ। यस सम्झौता अनुसार ट्रक व्यवसायीहरूले सुरुङमार्ग प्रयोग गर्दा लाग्ने प्रवेश शुल्क क्यूआर कोडमार्फत नगदरहित प्रणालीबाट तिर्न सक्नेछन्। सुरुङमार्ग सञ्चालनको तयारी भइरहेका बेला भुक्तानी प्रक्रियालाई सहज र पारदर्शी बनाउन यो पहल गरिएको हो। यसले यातायात क्षेत्रमा प्रविधिको प्रयोग बढाउनुका साथै भीडभाड कम गर्न सहयोग पुग्ने अपेक्षा गरिएको छ।