बेँसीसहर–चामे सडक ६ दिनपछि सञ्चालनमा आयो

लमजुङमा लगातार चार दिनको वर्षाका कारण आएको बाढी, पहिरो र नदी कटानले डुम्रे–बेँसीसहर–चामे सडकका विभिन्न स्थानमा क्षति पुगेको छ। डुम्रे–बेँसीसहर–चामे सडक आयोजनाले पहिरो पन्छाइ भत्किएका खण्डको मर्मत सुरु गरेको छ र मर्मत कार्य तीव्र पारिएको छ। सडक पूर्णरुपमा सञ्चालनमा ल्याउन करिब एक साता लाग्ने अनुमान गरिएको छ। डुम्रे–रामबजार, रामबजार–स्याङ्गे र नासो गाउँपालिकाको खोत्रोलगायत खण्डमा क्षति पुगेको विवरणमा उल्लेख छ।

बाढीपहिरोका कारण ६ दिनदेखि अवरुद्ध बेँसीसहर–चामे सडक सञ्चालनमा आएको छ। डुम्रे–बेँसीसहर–चामे सडक आयोजनाका सूचना अधिकारी नवीन विष्टका अनुसार नासोँ गाउँपालिका–३ खोत्रो र चामे गाउँपालिका–५ कोतोमा खसेको पहिरो तथा सडकमा थुप्रिएको ढुङ्गामाटो हटाएपछि सडक सञ्चालनमा आएको हो। बाढीपहिरोका कारण सडकका विभिन्न खण्डमा पहिरो खस्नुका साथै कतिपय स्थानमा सडक भासिएको थियो। सडक खुलेसँगै मनाङतर्फ खाद्यान्नलगायत दैनिक उपभोग्य सामग्री ढुवानी सुरु भएको छ।