तीनकुने हिंसा प्रकरणमा दुर्गा प्रसाईंविरुद्ध कारबाही गर्न आयोगको सिफारिस

राष्ट्रिय मानव अधिकार आयोगले २०८१ चैत १५ गते काठमाडौंको तीनकुनेमा भएको हिंसात्मक झडपका आयोजक दुर्गा प्रसाईंलगायतविरुद्ध कानुनी कारबाही गर्न सिफारिस गरेको छ। बुधबार सार्वजनिक भएको आयोगको विस्तृत अनुसन्धान प्रतिवेदनले 'राष्ट्र, राष्ट्रियता, धर्म, संस्कृति र नागरिक बचाउ महाअभियान' का संयोजक तथा कमान्डर प्रसाईंले भीडलाई उक्साएर हिंसा भड्काएको ठहर गरेको छ। प्रतिवेदनमा प्रदर्शनको नाममा हिंसा र अराजकता निम्त्याउने कार्यमा संलग्न मुख्य व्यक्तिहरूलाई कानुनी दायरामा ल्याउन र पीडितहरूलाई राहत दिन सरकारलाई निर्देशन दिइएको छ।