मर्मतपछि मुस्ताङ र अन्नपूर्णमा विद्युत् आपूर्ति पुनः नियमित

बाढीपहिरोका कारण अवरुद्ध म्याग्दीको अन्नपूर्ण गाउँपालिका र मुस्ताङको विद्युत् आपूर्ति मर्मतपछि पुनः नियमित गरिएको छ। असोज ८ देखि ११ गतेसम्मको वर्षापछि कालीगण्डकी नदीमा आएको बाढीले अन्नपूर्ण गाउँपालिकाको पोखरेबगर, धिरच्याङ र दोवाको भिरकाटेमा २२० केभी क्षमताको दाना–खुर्कोट प्रसारण लाइनका चार वटा टावर ढलाएको थियो। नेपाल विद्युत् प्राधिकरणको तातोपानी वितरण केन्द्रका प्रमुख हेमराज चापागाईंका अनुसार मिलनचोकदेखि दाना हुँदै मुस्ताङको कोवाङसम्मको ३३ केभी प्रसारण लाइन मर्मत गरी वैकल्पिक व्यवस्थाबाट विद्युत् आपूर्ति सुचारु गरिएको छ।