महानवमी : नवरात्रको अन्तिम दिन सिद्धिदात्री देवीको विधिपूर्वक पूजा

आज शारदीय नवरात्रको नवौँ दिन हो, जस दिन नवदुर्गाको अन्तिम स्वरूप देवी सिद्धिदात्रीको पूजा तथा आराधना गरिँदैछ। शास्त्रीय मान्यताअनुसार देवी सिद्धिदात्रीलाई सम्पूर्ण सिद्धि प्रदान गर्ने देवीका रूपमा श्रद्धापूर्वक पूजा गरिन्छ। उनको उपासनाले भक्तजनको मनोकामना पूरा हुनुका साथै घरपरिवारमा सुख, शान्ति र समृद्धि प्राप्त हुने विश्वास छ। काठमाडौँलगायत स्थानमा विधिपूर्वक पूजा तथा आराधना भइरहेको छ।

शारदीय नवरात्रको नवौँ दिन आज दसैँ घर तथा पूजा कोठामा नवदुर्गामध्येकी नवौँ स्वरूप देवी सिद्धिदात्रीको विधिपूर्वक पूजाआराधना गरिएको छ। आश्विन शुक्ल नवमी अर्थात् महानवमीका दिन वैदिक सनातनी परम्पराअनुसार सिद्धिदात्री देवीको पूजा गर्ने प्रचलन छ। शास्त्रीय मान्यताअनुसार पूर्ण निष्ठाका साथ सिद्धिदात्रीको उपासना गर्नाले साधकलाई सबै प्रकारका सिद्धि प्राप्त हुनुका साथै घरपरिवारमा सुख, शान्ति र समृद्धि प्राप्त हुने विश्वास छ।