एनपीएलमा १६ वर्षीय राहुल यादवले पहिलो ओभरमै विकेट लिए

नेपाल प्रिमियर लिग (एनपीएल) क्रिकेटको तेस्रो संस्करणमा जनकपुर बोल्ट्सका १६ वर्षीय बलर राहुल यादवले लगातार दुई खेलमा पहिलो ओभरमै विकेट लिएका छन्। कीर्तिपुरस्थित अन्तर्राष्ट्रिय क्रिकेट मैदानमा बिहीबार काठमान्डु गोर्खाजविरुद्धको खेलमा उनले पहिलो ओभरको पहिलो बलमै ओपनर साम हेजलेटलाई मोइन अलीद्वारा क्याच गराए। काठमान्डु गोर्खाजविरुद्ध चार विकेट लिएका उनलाई प्लेयर अफ दि म्याच घोषित गरियो र जारी एनपीएलमा उनको विकेट संख्या छ पुगेको छ। रौतहटको चन्द्रनिगाहपुरबाट आएका दायाँहाते मध्यमतेज बलर राहुलले एनपीएलको मञ्च आफ्ना लागि सिक्ने अवसर भएको बताएका छन्।