पत्रकार पक्राउको विरोधमा कांग्रेस महामन्त्री पौडेल

नेपाली कांग्रेसका महामन्त्री प्रदीप पौडेलले समाचार संकलन तथा सूचना सार्वजनिक गरेकै आधारमा प्रहरी परिचालन गरी पत्रकार पक्राउ गरिएको घटनाप्रति कडा आपत्ति जनाएका छन्। शुक्रबार सामाजिक सञ्जालमार्फत धारणा सार्वजनिक गर्दै उनले यसलाई सर्वसत्तावादी प्रवृत्तिको पराकाष्ठा भन्दै सरकारको चर्को आलोचना गरेका छन्। सार्वजनिक पदधारण गरेका व्यक्तिका गतिविधि, न्यायिक शुद्धता र शक्ति दुरुपयोगका विषयमा खोजीनीति गरी नागरिकलाई सुसूचित गराउनु प्रेसको भूमिका भएको उनको भनाइ छ। यस किसिमको कार्यले प्रेस स्वतन्त्रता कुण्ठित गर्न खोजेको उनले बताए।