सीसीटीभी फुटेजका आधारमा दोषीलाई कारबाही गर्न नारायणी अस्पतालको माग

वीरगञ्जस्थित नारायणी अस्पतालले शनिबार भएको तोडफोडको घटनामा संलग्न व्यक्तिहरूलाई सीसीटीभी फुटेजका आधारमा पहिचान गरी कारबाही गर्न माग गरेको छ। अस्पतालका निमित्त मेडिकल सुपरिटेन्डेन्ट डा. चितरन्जन शाहले सोमबार विज्ञप्ति जारी गर्दै दोषीमाथि कानुनी प्रक्रिया अघि बढाउन आग्रह गर्नुभएको हो। वीरगञ्ज-२५ का ४५ वर्षीय राजकुमार पटेलको उपचारका क्रममा मृत्यु भएपछि आफन्तहरूले उपचारमा लापरबाही भएको आरोप लगाउँदै अस्पतालको आकस्मिक कक्षमा तोडफोड गरेका थिए।