सर्वोच्च अदालतद्वारा चार प्रकारका मुद्दाको प्रत्यक्ष प्रसारणमा रोक लगाउन अन्तरिम आदेश

सर्वोच्च अदालतले ठोस मापदण्ड नबनेसम्म चार विशेष प्रकृतिका मुद्दाहरूको प्रत्यक्ष प्रसारण नगर्न अन्तरिम आदेश जारी गरेको छ। न्यायाधीशद्वय विनोद शर्मा र शान्तिसिंह थापाको संयुक्त इजलासले अधिवक्ता जीवनकुमार शाहीद्वारा दायर रिटमा सुनुवाइ गर्दै यस्तो आदेश दिएको हो। प्रचलित कानुन अनुसार गोप्य राख्नुपर्ने र बन्द इजलासबाट सुनुवाइ हुने विषयवस्तुलाई प्रत्यक्ष प्रसारण नगर्न अदालतले मुख्य रजिष्ट्रारका नाममा निर्देशन दिएको छ। अदालतको कामकारबाहीलाई व्यवस्थित बनाउन आवश्यक निर्देशिका नबनेसम्म यो रोक कायम रहनेछ।