गण्डकी प्रदेशका नौ जिल्लामा डेंगु संक्रमण फैलियो, ८३९ जनामा पुष्टि

साउन महिना सुरु भएयता बागलुङ र गोरखा जिल्लामा डेंगु सङ्क्रमण तीव्र रूपमा फैलिरहेको छ। बागलुङ नगरपालिकामा मात्रै २१० जनामा सङ्क्रमण पुष्टि भएपछि यो क्षेत्र मुख्य केन्द्र बनेको छ। यस्तै, गोरखामा पछिल्लो तीन साताको अवधिमा ३५ जनामा डेंगु देखिएको स्वास्थ्य कार्यालयले जनाएको छ। सङ्क्रमितको सङ्ख्या बढ्दै गएपछि स्थानीय स्वास्थ्य निकायहरूले निगरानी बढाएका छन्।

गण्डकी प्रदेशका नौ जिल्लामा डेंगुको संक्रमण फैलिएको छ, जहाँ गत मंगलबारसम्म ८३९ जनामा संक्रमण पुष्टि भएको छ। प्रादेशिक रोग नियन्त्रण केन्द्रका अनुसार सबैभन्दा बढी बागलुङमा ३६६, कास्कीमा २२२ र गोरखामा ९९ जना संक्रमित फेला परेका छन्। तनहुँ, म्याग्दी, पर्वत, लमजुङ, स्याङ्जा र नवलपुरमा पनि संक्रमण देखिएको छ भने हिमाली जिल्ला मुस्ताङ र मनाङमा हालसम्म कुनै संक्रमित भेटिएका छैनन्।