कास्कीमा बाढीले बगाएको वीरेठाँटी–घान्द्रुक सडक नेपाली सेनाको सहयोगमा पुनर्निर्माण सुरु

बिहीबार रातिदेखि परेको अविरल वर्षाका कारण मोदी खोलामा आएको बाढीले कास्कीको अन्नपूर्ण गाउँपालिकामा ठूलो क्षति पुर्‍याएको छ। बाढीले बिरेठाँटी-घान्द्रुक पक्की सडकखण्डका साथै एउटा कच्ची घर बगाएपछि यस क्षेत्रको यातायात सम्पर्क पूर्ण रूपमा विच्छेद भएको छ। चिमुङ, स्याउलीबजार र सार्दीखोला जाने सडकहरूमा कटान भएपछि सवारी आवागमन ठप्प भएको छ। बाढीका कारण अन्नपूर्ण गाउँपालिकाका विभिन्न स्थानमा भौतिक पूर्वाधारमा क्षति पुगेको स्थानीय अधिकारीहरूले जनाएका छन्।

कास्कीको अन्नपूर्ण गाउँपालिका–८ स्थित वीरेठाँटी–घान्द्रुक सडकखण्डको पुनर्निर्माण नेपाली सेनाको सहयोगमा सुरु भएको छ। मोदी खोलामा आएको बाढीले करिब १०० मिटर कालोपत्र सडक बगाएपछि गाउँपालिकाका चारवटा वडाको सडक सम्पर्क विच्छेद भएको थियो। अविरल वर्षाका कारण आएको बाढी र पहिरोले सडकका साथै स्थानीय भौतिक संरचना र घरहरूमा समेत क्षति पुर्‍याएको छ। पर्यटकीय क्षेत्र अन्नपूर्ण जाने यो मुख्य मार्ग अवरुद्ध हुँदा यातायात सेवा पूर्ण रूपमा ठप्प भएको थियो।