झुटो विवरण पेस गरी शिक्षक नियुक्ति लिएको आरोपमा दुई जनाविरुद्ध मुद्दा दायर

अख्तियार दुरुपयोग अनुसन्धान आयोगले लमजुङको आदर्श बाल माध्यमिक विद्यालयका शिक्षक नवराज केसी र तत्कालीन निमित्त जिल्ला शिक्षा अधिकारी होमनाथ न्यौपानेविरुद्ध विशेष अदालतमा भ्रष्टाचार मुद्दा दायर गरेको छ। शिक्षक केसीले आफू विस्थापित शिक्षक भएको झुटो विवरण पेस गरी माध्यमिक तहको स्थायी शिक्षक नियुक्ति लिएको अनुसन्धानबाट खुलेको छ। तत्कालीन निमित्त जिल्ला शिक्षा अधिकारी न्यौपानेले उक्त झुटो विवरणलाई प्रमाणीकरण गरी नियुक्तिमा सहयोग गरेको आरोप लगाइएको छ। आयोगले बुधबार काठमाडौँस्थित विशेष अदालतमा उनीहरूविरुद्ध आरोपपत्र दर्ता गरेको हो।