जनकपुरधाममा सार्वजनिक जग्गा र पोखरी अतिक्रमण हटाउँदा भेदभाव नगर्न सांसद झाको माग

राष्ट्रिय स्वतन्त्र पार्टीका सांसद मनिष झाले सोमबार प्रतिनिधिसभाको बैठकमा बोल्दै जनकपुरधाममा सार्वजनिक जग्गा र पोखरी अतिक्रमण गरी बनाइएका संरचना हटाउने अभियानमा सानालाई मात्र नभई ठूलालाई पनि कारबाही गर्न माग गर्नुभएको छ। शनिबारदेखि सुरु भएको यस अभियानमा हालसम्म ७ वटा पोखरी र ६५ वटा घरटहरामा डोजर चलाइएको जानकारी दिँदै उहाँले ९५० बिघा सार्वजनिक जग्गा फिर्ता गर्न सरकारको ध्यानाकर्षण गराउनुभयो। सांसद झाले गरिबका घरटहरा मात्र भत्काउने र पहुँचवालालाई उन्मुक्ति दिने कार्य हुन नहुनेमा जोड दिनुभएको छ।