युएईले नेपाली श्रमिकको प्रहरी रिपोर्ट प्रमाणीकरण शुल्क आधा घटाउने

संयुक्त अरब इमिरेट्स (युएई) ले नेपाली श्रमिकको प्रहरी चारित्रिक प्रमाणपत्र प्रमाणीकरणमा लाग्दै आएको शुल्क ५० प्रतिशत घटाउने भएको छ। नेपाल वैदेशिक रोजगार व्यवसायी संघका अध्यक्ष डिकबहादुर खत्रीको नेतृत्वमा संघको प्रतिनिधिमण्डलले नेपालस्थित युएईका राजदूत अब्दुल्लाह सइद मुबारक जरवान अल शम्सीसँग काठमाडौंमा गरेको भेटवार्तामा यस्तो सहमति भएको संघले जनाएको छ। संघका अनुसार अक्टोबर २०२६ देखि युएई रोजगारीमा जाने नेपाली श्रमिकलाई यो छुट लागू हुनेछ। छलफलमा संघले पुलिस रिपोर्ट प्रमाणीकरणबिनै नेपाली श्रमिकलाई युएई लैजान सकिने व्यवस्था गर्न पनि अनुरोध गरेको जनाएको छ।