कांग्रेस १५औँ महाधिवेशनमा पदाधिकारी संख्या बढाउने तयारीमा

नेपाली कांग्रेसको १५औँ महाधिवेशन नजिकिँदै गर्दा पार्टीभित्र पुरानो गुटगत र प्यानलगत प्रतिस्पर्धाभन्दा व्यक्तिगत रूपमा पदाधिकारीको दाबी सुरु भएको छ। सभापतिदेखि महामन्त्री, उपसभापति र सहमहामन्त्रीसम्मका आकांक्षीहरू सार्वजनिक रूपमा खुल्न थालेका छन्। सहमहामन्त्री पदमा अहिलेसम्म पाँच जनाले आकांक्षा जनाएका छन्।

नेपाली कांग्रेसले आफ्नो १५औँ महाधिवेशनमा पदाधिकारीको संख्या बढाउने तयारी गरेको छ। २०८३ असोज १७ गतेदेखि काठमाडौँमा सुरु हुने महाधिवेशनको बन्दसत्रमा एक उपसभापति र एक महामन्त्री थप्ने प्रस्ताव लैजाने गरी शीर्ष तहले आज टुङ्गो लगाउने एक पदाधिकारीले बताएका छन्। महामन्त्री प्रदीप पौडेल संयोजकत्वको विधान संशोधन समितिले विधान संशोधनको काम गरिरहेको छ। यसैबीच निवर्तमान केन्द्रीय सहमहामन्त्री महालक्ष्मी उपाध्याय ‘डिना’ले महामन्त्री वा उपसभापतिमध्ये एक पदमा उम्मेदवारी दिने बताएकी छन् भने सहमहामन्त्रीका ११ पदका आकांक्षीहरू पनि सार्वजनिक हुन थालेका छन्।