सरकारले लोकतन्त्रका मूल्य र मर्म पालना गर्नुपर्छ : आङदेम्बे

नेपाली कांग्रेसका संसदीय दलका नेता भीष्मराज आङदेम्बेले सरकारले लोकतन्त्रका मूल्य, मान्यता र मर्म पालना गर्नुपर्ने बताएका छन्। सरकारका कतिपय कदम लोकतान्त्रिक मूल्य र मान्यताअनुकूल नदेखिएको उनको भनाइ छ। नेपाली कांग्रेसको १५औँ महाधिवेशनअन्तर्गत पाँचथरको फिदिममा आयोजित प्रदेशसभा क्षेत्र नं. १ र २ को अधिवेशन उद्घाटन कार्यक्रममा बोल्दै उनले प्रहरी कानुन कार्यान्वयन गर्ने निकायभन्दा आदेशपालकजस्तो देखिन थालेको टिप्पणी गरे। उनले पूर्वप्रधानन्यायाधीश चोलेन्द्रशमशेर जबरालाई मध्यरातमा पक्राउ गरिएको विषय पनि उल्लेख गरे।