गौतमबुद्ध विमानस्थल नियमित अन्तर्राष्ट्रिय उडानको प्रतीक्षामा, निजी क्षेत्रको आशा नयाँ सरकारतिर

रुपन्देहीमा रहेको गौतमबुद्ध अन्तर्राष्ट्रिय विमानस्थल निर्माण सम्पन्न भई सञ्चालनमा आएको साढे चार वर्ष पुग्न लाग्दासमेत नियमित अन्तर्राष्ट्रिय उडानको पर्खाइमा छ । मुलुकको पर्यटन तथा हवाई पूर्वाधार विस्तारका लागि राज्यले धेरै लगानीमा यो विमानस्थल निर्माण गरेको थियो । अब निजी क्षेत्रले नयाँ सरकारबाट विमानस्थलमा अन्तर्राष्ट्रिय उडान सुरु हुने आशा राखेको छ ।

करिब रु ३५ अर्ब लगानीमा निर्माण भएको रुपन्देहीस्थित गौतमबुद्ध अन्तर्राष्ट्रिय विमानस्थल सञ्चालनमा आएको साढे चार वर्ष पुग्न लाग्दासमेत नियमित अन्तर्राष्ट्रिय उडान हुन सकेको छैन। विमानस्थललाई केन्द्रमा राखेर होटल, पर्यटन र यातायातलगायत क्षेत्रमा ठूलो लगानी गरेका निजी क्षेत्रका व्यवसायीले नियमित उडानका लागि पटकपटक सरकारको ध्यानाकर्षण गराउँदै आएका छन्। सिद्धार्थ उद्योग वाणिज्य सङ्घका अध्यक्ष नेत्रप्रसाद आचार्यका अनुसार निजी क्षेत्रको आशा नयाँ सरकारले नियमित अन्तर्राष्ट्रिय उडान सुरु गर्नेतिर छ। अर्बौं लगानीको यो विमानस्थल अहिले पनि नियमित उडानको पर्खाइमा सुनसान अवस्थामा छ।