तनहुँमा दुई हजार पाँच सय ४८ किशोरीलाई एचपीभी खोप

प्रदेश जनस्वास्थ्य कार्यालयका अनुसार तनहुँ जिल्लाका दुई हजार पाँच सय ४८ किशोरीलाई पाठेघरको मुखको क्यान्सरविरुद्ध एचपीभी खोप लगाइएको छ। जिल्लाका दश पालिकाका विद्यालयमा अध्ययनरत कक्षा ६ का दुई हजार पाँच सय ४२ र विद्यालयबाहिर रहेका दश वर्ष उमेरका छ किशोरीलाई खोप लगाइएको हो। जिल्लाका दशवटै स्थानीय तहका दुई सय ५४ विद्यालयमा खोपकेन्द्र तोकी अभियान सञ्चालन गरिएको थियो, जसमध्ये व्यास नगरपालिकाका ७३५, शुक्लागण्डकी नगरपालिकाका ४६९, भानु नगरपालिकाका २१६, बन्दीपुर गाउँपालिकाका १८६ र ऋषिङ गाउँपालिकाका ११२ किशोरी रहेका छन्। यसै अभियानअन्तर्गत गोरखा जिल्लामा एक हजार सात सय ६४ किशोरीलाई खोप लगाइएको छ।