कोरिया पठाइदिने भन्दै ठगी गरेको आरोपमा कन्सल्टेन्सी सञ्चालक गणेश पाण्डे पक्राउ

दक्षिण कोरिया पठाइदिने प्रलोभन देखाई ठगी गरेको आरोपमा प्रहरीले 'न्यू सफल ग्लोबल कन्सल्टेन्सी'का सञ्चालक गणेश पाण्डेलाई पक्राउ गरेको छ। काठमाडौं उपत्यका अपराध अनुसन्धान कार्यालयको टोलीले २८ वर्षीय पाण्डेलाई रानीबारी चोकबाट नियन्त्रणमा लिएको हो। एक महिलाले आफ्नो छोरालाई कोरिया पठाइदिने भन्दै दुई वर्षदेखि अलपत्र पारेको आरोप लगाउँदै टिकटकमार्फत प्रधानमन्त्री र गृहमन्त्रीसमक्ष कारबाहीको माग गरेपछि प्रहरीले उनलाई पक्राउ गरेको हो। नुवाकोटको बेलकोटगढी नगरपालिका-११ स्थायी घर भई हाल काठमाडौंको सामाखुसी बस्दै आएका पाण्डेलाई हिजो पक्राउ गरिएको हो।