नजरबन्दमा राखिएका राजावादी नेता नवराज सुवेदीलाई क्षतिपूर्ति दिन आयोगको सिफारिस

राष्ट्रिय मानव अधिकार आयोगले २०८१ चैत १५ गतेको तीनकुने घटनापछि बिनापुर्जी २५ दिनसम्म निजकै निवासमा गैरकानुनी रूपमा नजरबन्दमा राखिएका राजावादी नेता नवराज सुवेदीलाई क्षतिपूर्ति उपलब्ध गराउन सरकारलाई सिफारिस गरेको छ। बुधबार सार्वजनिक आयोगको अनुसन्धान प्रतिवेदनले ८५ वर्षीय ज्येष्ठ नागरिक सुवेदीलाई गैरकानुनी रूपमा घरमै नजरबन्दमा राखिएको ठहर गरेको छ। आयोगले नजरबन्दको २५ दिनको अवधिको हिसाबले दैनिक ५०० रुपैयाँका दरले कुल १२ हजार ५०० रुपैयाँ क्षतिपूर्ति दिन सिफारिस गरेको छ। साथै तत्कालीन सीडीओलाई सचेत गराउन पनि आयोगले सिफारिस गरेको छ।