मनसुन नेपालबाट पूर्ण रूपमा बाहिरियो, सरदरभन्दा १२ दिन ढिलो

जल तथा मौसम विज्ञान विभाग, मौसम पूर्वानुमान महाशाखाका अनुसार यस वर्षको मनसुन नेपालको सम्पूर्ण भू–भागबाट पूर्ण रूपमा बाहिरिएको छ। बुधबार मनसुन बाहिरिएको हो, जुन सरदर मितिभन्दा १२ दिन ढिलो हो। यस वर्ष मनसुन १९ जुन अर्थात् असार ५ गते नेपाल भित्रिएको थियो। यसअघि असोज १७ गते सुदूरपश्चिम प्रदेशबाट मनसुन बाहिरिएको थियो।

जल तथा मौसम विज्ञान विभागअन्तर्गतको मौसम पूर्वानुमान महाशाखाले बुधबार बुलेटिन जारी गर्दै यस वर्षको मनसुन नेपालको सम्पूर्ण भूभागबाट पूर्ण रूपमा बाहिरिएको जनाएको छ। यसअघि असोज १७ गते सुदूरपश्चिम प्रदेश, कर्णाली प्रदेशलगायत लुम्बिनी प्रदेशको पश्चिमी भूभाग र गण्डकी प्रदेशको पश्चिमी भूभागका थोरै स्थानबाट मनसुन बहिर्गमन सुरु भएको थियो। यस वर्ष मनसुन जुन १९ अर्थात् असार ५ गते भित्रिएको थियो र सरदर मितिभन्दा १२ दिन ढिलो गरी बाहिरिएको छ।