कांग्रेसले सरकारलाई 'भय र भ्रमको शासन' अन्त्य गर्न चेतावनी दियो

नेपाली कांग्रेसले सरकार स्वेच्छाचारी र निरंकुश बन्दै गएको आरोप लगाउँदै ‘भय र भ्रमको शासन’ तत्काल बन्द गर्न चेतावनी दिएको छ। महामन्त्री प्रदीप पौडेलले बुधबार जारी गरेको वक्तव्यमा राज्य संयन्त्रको दुरुपयोग, प्रतिपक्षको आवाज दबाउने प्रयास र पार्टीविरुद्ध फैलाइएको प्रचारको राजनीतिक तथा कानुनी रूपमा प्रतिवाद गर्ने बताएका छन्। कांग्रेसले ‘इनम सापकोटा प्रकरण’ मा प्रधानमन्त्री कार्यालय र उच्चपदस्थ अधिकारीहरूको संलग्नता रहेको आरोप लगाएको छ। सानेपास्थित पार्टी कार्यालयमा बसेको आकस्मिक पदाधिकारी बैठकपछि आयोजित पत्रकार सम्मेलनमा वरिष्ठ उपसभापति विश्वप्रकाश शर्माले पनि त्यस्तै धारणा राखेका थिए।