दलको राजनीतिमा संलग्न शिक्षकविरुद्ध कारबाही गर्न निर्देशन

शिक्षा तथा खेलकुद मन्त्रालयले सामुदायिक विद्यालयका शिक्षकहरू राजनीतिक दलका कार्यक्रममा सहभागी भएको विषयमा देशभरका शिक्षा विकास तथा समन्वय एकाइहरूलाई आवश्यक कारबाही गर्न निर्देशन दिएको छ। बैतडी, बागलुङ, सिन्धुली, सिन्धुपाल्चोक, मुगु र रौतहटलगायत जिल्लामा शिक्षकहरू यस्ता गतिविधिमा संलग्न भएको भन्दै मन्त्रालयले ध्यानाकर्षण गराएको हो। उदयपुरमा शिक्षा विकास तथा समन्वय एकाइले सिंहदरबारस्थित विद्यालय शिक्षा शाखाको पत्राचारका आधारमा सामुदायिक विद्यालयका सबै शिक्षकलाई राजनीतिक दलका कार्यक्रममा सहभागी नहुन निर्देशन दिएको छ। एकाइ प्रमुख भवानीप्रसाद कट्टेलद्वारा हस्ताक्षरित पत्रमा सामाजिक सञ्जाल तथा सञ्चारमाध्यममा शिक्षकहरूको गतिविधिलाई पनि समेटिएको छ।