बाढीले मालढुङ्गा पुलको पहुँचमार्ग बगाउँदा बागलुङमा १२ दिनदेखि यातायात ठप्प

बाढीले पुलमा क्षति पुर्‍याएपछि बागलुङमा मुख्य सडक सम्पर्कविच्छेद भई यातायात ठप्प भएको छ। चाडबाडको समयमा कालिका मन्दिर, पञ्चकोट हुँदै ढोरपाटनसम्म जाने पर्यटक प्रभावित हुँदा पर्यटन र व्यापार व्यवसायमा असर परेको छ। यस वर्ष पनि राम्रो आर्थिक गतिविधिको अपेक्षा गरेका बागलुङका व्यवसायी निरास र खिन्न छन्।

बाढीले बागलुङ प्रवेश गर्ने मुख्य नाका मालढुङ्गा पुलको पहुँचमार्ग बगाएपछि १२ दिनदेखि नियमित यातायात अवरुद्ध भएको छ। मुख्य सडक सम्पर्कविच्छेद हुँदा बागलुङको पर्यटन, व्यापार–व्यवसाय तथा दैनिक उपभोग्य वस्तुको आपूर्तिमा असर परेको छ। दसैँको समयमा कालिका मन्दिर, पञ्चकोट हुँदै ढोरपाटनसम्म पर्यटक आउने अपेक्षा राखेका व्यवसायी यस वर्ष बजार तथा होटलमा चहलपहल नभएपछि निरास बनेका छन्।